No acto inaugural participaron representantes da Deputación e do Concello de Lugo, da Facultade de Veterinaria e de Seragro.
O enxeñeiro agrónomo especialista en industrias agroalimentarias Jaime Magdalena expuxo como a calidade do leite en orixe condiciona a calidade dos produtos lácteos nos procesos industriais.
A directora técnica do Ligal, María Luisa Barreal, compartiu cos asistentes o protocolo de inhibidores en leite cru de vaca
Gordon Jones (EE. UU.) puxo o foco no manexo e na alimentación do período seco da vaca para conseguir resultados satisfactorios e asegurar unha produción óptima na seguinte lactación.
Juan Moreno, CEO da empresa Sexing Technologies, departiu acerca das oportunidades que a biotecnoloxía ofrece para a produción sostible de proteína animal nun mundo que, segundo as previsións da ONU, alcanzará os 9 billóns de habitantes no ano 2050.
O veterinario holandés Peter Van’t Veld ofreceu unha conferencia sobre calidade e manexo de lactosubstituíntes para a cría de xatas.
O profesor da Universidade de Lleida Ramón Armengol explicou como establecer un plan lóxico de descarte e eliminación de vacas a fin de maximizar a eficiencia produtiva e reducir as baixas involuntarias.
Na súa segunda intervención, Gordon Jones desenvolveu unha serie de aspectos prácticos de manexo que teñen que ver co benestar animal e que el considera claves para conseguir altas producións e eficiencia produtiva.
O veterinario David García falou sobre control de insectos, roedoes e aves a fin de evitar a propagación de enfermidades nas granxas e minimizar os riscos de introdución doutras novas.
Almudena Tato, do Servizo de Calidade do Leite de Seragro, profundou sobre a terapia selectiva de secado, baseada na escolla daquelas vacas que precisan antibiótico fronte ás que non.
A enxeñeira técnica agrícola Rebeca Cembranos compartiu cos asistentes a súa experiencia como asesora en nutrición de granxas en Saxonia (Alemaña).
O xerente de Casa Grande de Xanceda, Guillermo Martínez, repasou a historia e o día a día desta gandería galega, que aposta polo pastoreo dos seus animais en ecolóxico como base do seu sistema produtivo.
O técnico de xestión de Seragro Gonzalo Gómez expuxo as alternativas para o descanso das vacas e os seus custos en Galicia.
O técnico do Servizo de Podoloxía de Seragro José María García puxo en relación o tipo de cama e a saúde podal dos animais.
O enxeñeiro agrónomo Adolfo López abordou as consecuencias que a area empregada nos cubículos pode ocasionar a longo prazo na fertilidade das terras de cultivo.
O veterinario especialista en calidade do leite Oriol Franquesa falou da alternativa de reutilización do esterco como material de encamado.
O gandeiro Pedro Ezcurra (socio da gandería navarra Aldapa SCL) compatiu a experiencia co uso da fracción sólida do xurro como material de encamado despois de hixienizala nunha biocélula vertical.
A alergóloga Beatriz Veleiro puxo punto e final ás XVII Xornadas cun relatorio sobre as alerxias relacionadas co leite.